FC悉尼與墨爾本勝利周中一起出征上海，都未能全取三分。FC悉尼與FC上海上半場鬥攻，打和2:2，韋基舒亞及保斯基有入球，可惜防守不夠嚴密，令列美尼疲於奔命。勝利遭上海SP重挫，若非貝利沙12碼破蛋，必定敗得更難看，而奧斯卡玩弄湯馬士丹治的情景，亦足見水平未夠。
兩隊踢罷兩輪分組賽之後只有一分在手，出線形勢嚴峻，但更要擔心他們的板凳深度不夠堅厚，兩隊與上周澳職比較，都只換了一個球員，大部份主力要兼顧一周雙賽，確實吃力，亦是澳職球隊未有足夠投資度的問題。所以回到澳職比賽，都是賽前看看他們的陣容才出手未遲。
悉尼將在下星期日打吡戰惡鬥西悉尼流浪者，大戰當前，保保、連高域、保斯基等都冇得休息。雙方今季兩次對決，炮製2:2及5:0兩個大比數，我們當然期待大手交易再現。但西流近況不俗，上周面對紐卡素噴射機能夠打和2:2，近三戰兩勝一和攻入八球，甘巴爾看來經已找到搶分良方，目標直指最後六強，受讓下捧西流值博，入球「大」[2.5]亦有信心。至於勝利周末主場迎戰阿德萊德聯，阿聯近四場作客兩勝一和一負，走勢不俗，三場半場更無失球，捧半場波膽0:0及0:1。
今日的榜尾大戰，中岸水手已連續11場不勝，威靈頓鳳凰上周擊敗珀斯光輝，暫時止血，可惜兩隊積分只有17分，爭入季後賽機會微，期望球員為面子而戰，踢出鬥志，製造更多入球，捧入球「大」[2.5]。
立民
澳職專家
全新亞洲波專頁《阿周足球》經已開通，將會聯乘《體蘋果》推出走地澳職推介，希望各讀者多多支持及與我們即時互動！