近排走勢唔錯嘅皇家馬德里，喺周三西甲補賽作客雷加利斯，讓足車馬炮一樣夠贏。主帥施丹收起基斯坦奴朗拿度（C朗）等主力，先失守下以3:1反勝。
C朗同首席門將基羅拿華斯雙雙休息，加上馬些路、卻奧斯同埋莫迪歷都受傷缺陣，皇馬喺今場補賽以半隊主力出戰雷加利斯，喺開波六分鐘就先失波，不過好快喺五分鐘後就由盧卡斯華斯基斯扳平。到29分鐘皇馬反超前，中場卡斯米路撞射破網，半場領先2:1。
踢到完場前發生小插曲，銀河艦隊獲得12碼，後備上陣嘅加里夫巴利上前想主射，但被隊長沙治奧拉莫斯拒絕，由佢自己操刀搞掂，結果喺佢第550次代表皇馬上陣嘅比賽入波，助皇馬贏3:1。拉莫斯賽後強調同巴利之間冇芥蒂，當時亦唔係爭射12碼。皇馬西甲三連勝升上聯賽第三，不過依然落後榜首巴塞隆拿14分。