新春個個都會着靚靚，但相信點樣都唔及商經局常秘利敏貞搶鏡，皆因佢周二同局長邱騰華出席記招，講番政府擬放寬傳統媒體跨媒體擁有權限制進行諮詢，嗰襲好難carry嘅「鳳袍」極吸睛，特別係雙層「雲肩」式衫領，似足清朝宮服，有人仲將佢同慈禧太后畫像對照。據知前日利敏貞一出鏡，添馬政總內嘩聲四起，唔少人讚邱騰華定力好，似乎冇因為常秘嘅「奇裝」心不在焉。
查實利敏貞專責通訊及創意產業，有添馬中人笑稱，佢可能係以身作則推動「創意」！作家健吾都好「識貨」，喺fb話「成個諮詢會我都集中唔到睇，我個腦只係喺度諗，究竟件衫，喺邊度買嘅？」網民更驚嘆終於出現陳冠希都救唔到嘅衣着。
利敏貞喺2014年港視發牌風波中，時任通訊局辦公室總監嘅佢鬧過王維基混淆角色，當咗自己係規管機構，多次隔空開火。
寸TVB一毫子唔使畀
就算轉咗位，利敏貞戰鬥力不減。日前佢喺記者會上被問到點解唔減收傳統電視台牌費，好讓同網台競爭時，主動提及免費電視台佔用非常珍貴嘅大氣電波，須同時肩負社會責任，例如要轉播港台節目同政府宣傳片，故此同電訊商唔同，「一毫子嘅頻譜使用費都唔使畀」，只係須支付牌費，似乎寸爆無綫早前擅抽港台《頭條新聞》，違反牌照條款在先，卻反批轉播港台規定不合時宜，聲言每年唔止要交近2,000萬牌費，轉播政府宣傳片仲等同損失數以億元商業價值。
李八方