娥特誓言要改善行政立法關係，除咗喺立法會搞半小時「短問短答」質詢，仲約咗民主派嘅專業議政6位成員喺4月6日去禮賓府開餐，話明不設特定議題。八方問過民主黨同公民黨，都話冇收過邀請，唔通專業議政係林鄭未來重點拉票對象？
專業議政四位成員梁繼昌、郭榮鏗、葉建源、邵家臻噚日拉埋醫學界陳沛然同傳媒團拜。佢哋話知道傳媒好關心林鄭同邊個民主派WhatsApp咁friend，笑騎騎話呢個人不在今次團拜。
專業議政強調，唔會因為娥特一餐飯而改變立場，例如堅持反對一地兩檢，嚟緊佢哋亦會隨立法會團參觀高鐵西九站、4月去大灣區考察，強調堅持捍衞香港核心價值、法治制度之時，亦唔抗拒香港適度同內地嘅合作交流同發展，所以去大灣區考察梗係冇問題。