民建聯立法會議員葛珮帆（EQ）一向同多個紀律部隊工會老友鬼鬼，噚日大年初六，佢就約埋六大紀律部隊工會團拜，包括來自香港警察隊員佐級協會嘅主席陳祖光、懲教署、消防處等多個工會代表都畀面出席，仲連飛行服務隊工會代表都係座上客。
EQ話呀，新一年希望為工會提出四大訴求，提升一眾紀律部隊士氣，透露上個月已經同多個紀律部隊職方代表開會討論，四大訴求包括每六年進行一次職系架構檢討，配合社會氛圍同各紀律部隊嘅改變；為紀律部隊人員購買私人醫療保險；延長紀律部隊人員退休年齡到60歲，最最最最最重要嘅就當然係訂立「侮辱罪」，令公務員執行職務時唔使受到語言暴力傷害喎。