公民黨黨魁楊岳橋（AY）去年底拉埋天窗，好多人都以為佢今年開始要派利是，但原來AY鑑於議員工作性質，去年新年已經開始派利是，所以AY話派利是對佢嚟講，唔算好新奇刺激，今年最大分別，係要派埋畀親戚。至於使唔使大出血，AY拒絕透露金額，但笑言：「係合理數字啫。」
AY話新年願望係香港正正常常，自己就隨遇而安。佢又趁新年搞搞新意思，喺fb推出比「This AY」相對正經嘅「AY 810」系列短片，同大家探討香港揸車同泊車問題，其間自爆喺加拿大讀書時，試過有次去咗前女友宿舍「研究功課」，架車就泊咗喺學校迴旋處，點知學校突然響警鐘，AY聽到消防車聲當堂嚇咗嚇，好快就落樓揸走架車，好在冇造成好大問題啫。