劉二世向車公求籤，居然把沙田和香港的籤文調轉，亂七八糟，人神共笑。南極仙翁昨晚夢會車公，問道：「大元帥，劉二世話籤文掉包，係你刻意安排，真係㗎？」
只見他怒眼圓睜，連珠炮發：「屈我掉包？我掉佢呀！係我安排，就安排隻麒麟撞佢啦！而我不知道劉二世是誰。」
我問：「你今年同香港人講：『攝衣欲過灘頭海，轉計回來怕濕身。人若不信辛苦事，何能取得保安寧。』頭兩句，有個玄學家解做『捲起衫褲過海，都會濕身』，表示衰運避無可避；冇人解過『轉計』兩字，不如你講兩句。」
車公很驚訝：「乜依家解籤連中文都唔識㗎？『轉計』係解『反覆思量』吖嘛。頭兩句好簡單，意思係：提起件衫想過海，但諗過度過之後，怕濕身，所以都係返轉頭。點可能解衰運避無可避呢？如果咁解，呢支就唔係中籤，係下籤啦。」
我說：「算罷啦元帥，依家做中國人，唔使識中文，最緊要愛國。話時話，你舊年又幾靈喎，當時最多人傳言，話林鄭會當選特首，你支籤就講『傳來信息果無差』，老老實實，你同北京係咪行埋咗？得罪講句，你係咪投咗共先？」
車公側頭一笑：「講呢啲！」半晌才無奈說：「南極老弟，你可能太耐冇返仙界，真係離晒天。不過你喺地面都應該收到風啦，穌哥哥同佛祖level高我咁多，都一樣要投共：一個就入咗鳥籠，另一個直情被化身為習主席。其實仙界同香港一樣，已經赤化咗啦。我哋呢啲功能組別，有咩計唔跟阿爺吖？好似2014年，雖然明知佔中係人大自招，但我都怕坐洗頭艇，唔方便講咁白，只可以話『禍不空生自有招』，你明啦？玉皇大帝依家都搞緊『一帶仙路』、『冥信支付』，呢度就嚟仲會起道防夢牆，你下次發夢都搵唔到我㗎啦，報夢咁鬼落後，好心你下載個冥信啦。」語罷輕歎一聲，流露出淡淡哀愁。