剛剛舉行完嘅年初三（18日）賀歲馬跑夠11場，當日有香港經典盃及賀年盃，加上場內節目豐富，不失為馬季內其中一個精彩賽日；不過本月好戲在後頭，緊接的周日（25日）沙田日馬，由於四班1200米報名馬眾多，馬會一拆二，加開一場，換言之當日同樣會有11場賽事上演。
該日場數與初三睇齊，而更有兩場國際一級舉行，分別為1400米女皇銀禧紀念盃及2000米香港金盃，又係好馬雲集時候。
先說女皇銀禧紀念盃，有當今兩大灰色神獸「五十五十」（何良馬房）、「平湖之星」（容天鵬馬房）碰頭展開遭遇戰，未跑已經夠晒噱頭。
香港金盃則有萬眾期待嘅「巴基之星」闊別多時復出上陣，再跟廣大馬迷見面；講到焦點，當然係此駒屆時會唔會「舊病復發」罷跑，能否順利完成比賽、甚至乎奪標而返？
尚有藝人草蜢成員蘇志威名下「駿王」再度登場，出戰四班1600米，該駒曾被視為魚腩部隊，上場首次上名，更幾乎贏埋，蘇太劉小慧激動到眼濕濕，賽後仲話愛可以戰勝一切！故此今次「駿王」再出，睇吓成績會否再進一步。