財政預算案下周三公佈，雖然坐擁千億盈餘，但財政司長陳茂波早前明示政府唔會派錢，說法卻未獲建制派和應。繼工聯會立法會議員麥美娟日前建議政府直接派不少於6,000蚊後，民建聯立法會議員劉國勳噚日喺電台節目亦指庫房水浸下，支持政府派錢，「以往退電費又做過喇，注資又做過喇，總會被批評順得哥情失嫂意。係咪應該公平啲、人人都有呢？唔使諗咁多花招！簡單啲、直接啲，大家都開心，市民可以即時共享到。」
同場嘅白鴿黨主席胡志偉就話，估計本年度盈餘可達1,300億至1,400億，但政府往年處理盈餘時未能令全港市民受惠，部份市民或有怨氣，希望政府喺新一份預算案做到「雨露均霑」，長遠更要制訂「派錢機制」，喺安老、醫療、 醫藥及基層住屋方面增加投資。