沙田鄉事委員會噚日舉行新春團拜，席間當然熱議年初二調亂車公靈籤事件，沙田鄉委會主席莫錦貴直認責無旁貸，話成晚冇瞓過覺，希望可以做好啲，考慮邀請堪輿大師提出改善建議，但至今堅稱為香港求得嘅41籤同為沙田求得嘅21籤係「冇掉轉」，更質疑傳媒造假，不點名批評有傳媒以「動畫」剪接鏡頭，「（嗰）個唔係鏡頭，係特登接落去，你接落去，乜都得啦！」嘩，乜家陣興姓賴咩？
當初被揭懷疑調亂籤文後，曾指係「菩薩安排」嘅莫錦貴噚日再有新說法，佢話當時冇人知籤文講咩，冇意圖要掉轉，反而指「科學太先進」，質疑有傳媒報道造假，「為咗多兩個人聽我講，就將件事白轉黑、黑轉白」，但佢唔會去求證，認為冇造成唔開心或社會動盪就唔應該再提。
莫錦貴承認當日有混亂，之後會同鄉紳開會商討改善方法，包括安排求籤者親自執籤，或者全程搵人跟住，亦都考慮搵堪輿師傅建議改善方法，透露有意邀請有127年歷史嘅廣東真步堂第三代傳人、年屆96歲高齡嘅曆法權威蔡伯勵提供意見。
DQ主任幫拖籲包容
噚日同場出席春茗嘅仲有沙田民政事務專員、新界東立法會補選嘅選舉主任陳婉雯。DQ咗劉頴匡同陳國強嘅陳婉雯話喎，求錯籤嘅事由初二講到初五，可見沙田區嘅事受全港注目，佢當日喺現場見到鄉委會職員努力安排，又話求籤始終唔係人工智能，會有未盡完善嘅地方，希望港人多一份包容！DQ主任對求籤多多意見，但一被問到DQ事件，佢收起笑容就走，只強調：「仍然有法律程序，要問選舉事務處！」
李八方