話說噚日蘋果ATM請到「沈大師」訊滙證券行政總裁沈振盈，去黃大仙祠為港股求籤，以及黃大仙廟佛隱居士解籤！結果沈大師為港股、騰訊（700）、滙控（005），分別求得73號上上籤、61號下下籤以及33號中平籤。
先講港股枝73靈籤《孫霖中狀元》，籤詩提到，「夾道花香襯馬蹄，藍袍改換錦衣歸；滿街紅粉皆爭羨，翹首芳名雁塔題。」唔明籤文唔緊要，佛隱居士解說話，港股過咗7月後或會見高位，但預料今年港股表現大起大跌，籲股民勿高追。
為股王騰訊抽到的61靈籤《十二金牌召岳飛》，籤詩內容「十二金牌速召回，奸雄設計幾時灰；可憐一旦功勞散，老少扶車不斷哀。」居士解說指，今年騰訊起落大，一旦摸頂高追，有機會輸晒成副身家呀！小心小心！
至於今日放榜嘅滙控就抽到33靈籤《孔明借東風》：「曹操雖有深謀計，智慧難瞞諸葛侯；試看東風都可借，更能流馬木成牛。」居士話借東風，即北水，簡單講滙控成敗在北水！若得到北水支持，梗係掂啦。但北水唔支持，滙控就會大起大落，居士都係果句勿高追！仲睇五月開始「吹東風」升市，至年尾就會跌市咁話。
Anyway，投資同玄學一樣，信不信由你。