新正頭，最緊要好意頭，狗年〈八方相當年〉首位主角，就係行政會議成員林正財。個名咁好意頭，出自邊個手筆？佢話無從稽考，因為父母唔識字，當年喺博愛醫院出世後改名，有人就提議「正財」，「媽媽聽落覺得幾好吖，正正當當咁搵錢」，唔靠橫財，於是就取名正財。
利是得紅紙一張
今年57歲嘅林正財出身貧苦，自幼住喺錦田吉慶圍附近寮屋，父親做三行散工，後來因為交通意外不能工作，由母親打住家工擔起一頭家。屋企六兄弟姊妹中佢排第四，但遺憾一個家姐喺一次水浸中不幸過身。
「窮到連水果都冇得食，過年先有」，佢記得以前父母將最好嘅食物留畀仔女，有時連壓歲錢都負擔唔起，「最窮嘅時候得紅紙一張」，但明白家境困難，所以唔會同人比較。
林正財細個過年最大娛樂，莫過於跑到屋企後嘅大宅，爬過紅色大閘入去摘炮仗花，喺大宅獨居嘅婆婆過年會請食糖果，每逢暑假仲會託佢到花園執石仔，「每次都畀幾毫子」，長大後諗番，先明白點解石仔執極都有，「可能婆婆每次都倒番出嚟，其實係想畀錢我哋使，相信係佢嘅心意」。
林正財努力考上大學，成為兒科醫生，現時仲係安老事務委員會主席。佢好鍾意食傳統賀年食品，蘿蔔糕、煎堆同角仔樣樣啱，雖然高脂，但佢每周都踩200公里單車，試過農曆年假3日就達標，難怪身形fit爆。