農曆新年期間，旺角砵蘭街化身夜市，有超過40檔熟食小販擺檔，吸引市民掃街迎新歲，八方都有去趁墟，之不過夜市沿路嘅垃圾桶逼爆，垃圾堆積如山，仲有人隨手將用完嘅竹籤、紙袋同發泡膠碗隨街丟，有網民大鬧香港人冇公德心，唔配有夜市咁話。
有一班熱心人睇唔過眼，自組「維修香港－關懷社區服務隊」，小隊年初四凌晨自發到旺角清潔街道，掃垃圾直到凌晨4點幾，又掛上「亂拋垃圾 下流賤格」等橫額，呼籲市民自律，保持夜市環境清潔。
佢哋嘅行動感染到夜市檔主自發分類回收，同埋自備垃圾袋，亦有市民自發幫手清理街道，認為保持衞生係全賴買賣雙方自律。小隊希望日後再有夜市嘅話，市民要有公德心同自備餐具，源頭減廢。