號稱贏馬機器的雷神莫雷拉，於初三賀歲馬全日騎十駒全軍盡墨，最叻只「精算風暴」及「當家精選」雙雙得第四，全日他單在獨贏、位置、連贏三大彩池，共輸掉近2億元投注額，馬迷真係一殼眼淚。
悽慘過後，本周三(21日)谷草夜馬，雷神會否又再令馬迷失望呢？雖然今期九場賽事，雷神有兩場坐冷板只騎7駒，包括「永常喜」、「鐵男」、「歐洲之星」、「加州議長」、「安荃」、「天下為攻」及「與龍共舞」，但這批馬確實質量甚佳，全部於近三仗內有勝出或跑入前四名的紀錄，這7駒今次幾乎隻隻均有本錢在騎師王攞分。
其中第八場三班1200米之「天下為攻」，上季三歲時已擊敗過年長一歲的新灰色神獸「五十五十」；上仗「天下為攻」久休復出亦輕勝，實力有幾勁已毋須多講。
至於第一場五班1000米的「永常喜」亦非常值得重視，今場雷神棄騎上次由他跑第四之「勁駿皇駒」，而揀騎「永常喜」，加上快馬「永常喜」原來曾三次排三檔或以內跑五班賽例入Ｑ，今次抽正一檔利放，廐主方嘉柏2018年仍未開齋，加上此駒是轉倉初出，唔搏勢係假！