周日英足盃第五圈，熱刺（圖）雖有新兵盧卡斯莫拉取得加盟第一球，加上後備上陣嘅哈利卡尼完場前射入12碼，一度反超前主場嘅英甲包尾大幡羅奇代爾，但補時階段卻因艾達韋列特頭槌解圍時出錯，令敵軍扳成2:2平手，要返溫布萊重賽，至決定到八強席位。
熱刺今戰陣容，同上周二歐聯大戰祖雲達斯時完全唔同。洛蘭迪及一月新兵盧卡斯莫拉合作攻堅，防線方面，早前已傷癒嘅艾達韋列特再喺英足盃獲得上陣機會，同年僅20歲嘅阿根廷小將祖安科夫合作扼守中路。雖然半力出擊，但熱刺臨尾都反先2:1，以為放心去沖涼，點知艾達韋列特解圍犯錯頭槌跣後，被敵軍嘅史提夫戴維斯門前掃入，臨尾被摸和，無端端又要踢多場。