皇家馬德里狀態返晒嚟囉！周中歐聯主場3:1擊敗巴黎聖日耳門後，皇馬周日返到西甲作客貝迪斯大演入球騷，最終喺基斯坦奴朗拿度近六場轟入第10球下，以5:3擊敗對手。雖然C朗今場又有波入，不過主角就落咗喺剛滿22歲嘅馬高阿辛斯奧身上，事關上場歐聯佢後備交出兩個助攻，今仗正選11分鐘即為皇馬先開紀錄，但一向硬淨嘅貝迪斯喺上半場中段，五分鐘內連入兩球反先。下半場皇馬大舉搶攻，先憑沙治奧拉莫斯頭槌追平，阿辛斯奧再喺58分鐘射入3:2反超前嘅入波，呢個入球更加係皇馬喺西甲第6,000球。之後C朗成功破網拉開至4:2，貝迪斯雖憑沙治奧李安追近更3:4，但皇馬嘅賓施馬喺補時錦上添花，協助皇馬以5:3戰勝貝迪斯。