新年放咗4日假，唔少市民今日初五開工大吉，一班民主派3.11候選人都要開足turbo喺倒數前拉票！
喺新界東代表民主派出戰嘅新同盟范國威，面對建制派力谷民建聯鄧家彪，當然要全力迎戰。而喺農曆年前，咖喱范幾乎日日喺維園擺檔，分別喺守護公義基金同不同民主派政黨攤位為市民愛犬畫水墨畫（圖），就唔同議題籌款。
咖喱范喺美國三藩市美術大學畢業，畫功毋庸置疑，睇番佢照住狗仔相片嚟畫嘅水墨畫，真係同真狗冇分別，難怪市民讚不絕口，據知佢最終畫咗多達800幅，唔知算唔算香港紀錄？八方問佢邊種狗仔最難畫？佢神回一句「共狗」！嘩，真係「瑞犬護香江，安居樂同行」，八方都祝大家，狗年自求多福！