【《蘋果》專訪】
【閃耀人生女人生 袁詠儀系列之6 非常兒時】
袁詠儀（靚靚）出身於警察世家，兒時爸爸、哥哥、姑媽、姑丈、表哥等都是警察，為甚麼她不當差呢？她說：「我真係有諗過做警察！但我媽真係好早同我講：『你唔好喇，算啦！』佢話我份人黑白太分明，即係呢，你撞到個好嘅賊，人哋講幾句嘢，你可能就會放咗佢；但你遇着衰嗰啲賊呢，人哋都未咩箒你就打死咗佢，所以佢覺得我性格唔係好啱。」
靚靚在警察宿舍長大，從小就知道不可以做錯事：「我爹哋有時返嚟會話畀我聽，今日拉咗個乜嘢人呀，今日有個乜嘢點樣呀，由細到大我聽好多，你就唔多唔少會知道，唔可以做錯嘢，唔可以做壞事。」
等爸爸放工
童年時靚靚是很崇拜警察的，她說：「我覺得警察係除暴安良，好安全嘅人物。由細到大，我都喺警察宿舍同警察局生活，我試過㗎！人哋隔籬落緊案，我就喺度做功課，我爹哋好高大，好肥，佢叫『豬肉仔』，主要揸警車，變咗好多時可能對我嚟講有啲優惠，佢唔使成日出去行咇，我就可以跟住喺警局度等佢放工呀，或者係有啲空餘時間去玩。」
斜路打贏交
問靚靚在警察宿舍生活有甚麼難忘事，她說：「試過喺條斜路仔同一個女仔打交，因為夾埋阿哥一齊打，我叫阿哥騎住佢，我就揼佢，咁當然係我打贏。又有一次有個細路仔，喺宿舍邊度玩呀，跌死咗。阿媽要我哋夜晚攞啲嘢去嗰個地方，真係驚㗎！因為你要行嗰個後樓梯，我好記得嘅就係以前，啲𨋢係紅色，中間路口又會好暗㗎啲燈，但係阿媽一定要你去，好驚但要硬住頭皮。我好記得，自己一路行，一路喊，但係好快就行到喇喎！𠵱家覺得唔使驚，冇嘢嘅。我諗媽咪係要呢種環境訓練我哋，令到𠵱家有好多嘢都唔怕。」
採訪：陳月媚、倩宜
攝影：林德雄
化妝：Kerry wong
髮型：Sam Pan @Muse Hair