現年62歲嘅藝員陳榮峻同57歲吳香倫譜黃昏戀，去年尾求婚成功，噚日陳榮峻被問到婚禮點搞法？佢以短訊回覆傳媒：「未定實呀，只暫定7月10日，因甚麼手續都未辦，只希望7月10日能夠在堅道天主教總堂行禮。」
子女祝福
前晚由田蕊妮主持電視節目《1+1的深情》，搵咗呢對準夫妻、陳榮峻兒子同吳媽媽接受訪問。陳榮峻剖白8年前首任老婆因腦部爆血管離世，自己曾經諗過自殺！阿田問陳榮峻兒子點睇爸爸新戀情，佢話：「當時覺得好突然，因為媽咪走咗唔係好耐，點解突然間會變心，不過諗深一層，都3幾年，最後都覺得爸爸要有個伴，妹妹開頭都唔係好接受，覺得對媽咪不忠，不過慢慢開解完，𠵱家都祝福爸爸。」
跟住阿田讀出陳榮峻女兒嘅一封信，內容為多謝吳香倫兼祝福佢哋，令陳榮峻同吳香倫感動流淚；而陳榮峻更喺鏡頭前問准吳媽媽，更承諾會一生一世保護香倫，最後佢哋去咗影婚紗相，陳榮峻同吳香倫都話要身體健康，繼續走埋一段好長嘅路，阿田更親自操刀幫兩人拍照留念。
