下月立法會補選，相信建制派又要出動大量私家車、旅遊巴，皆因每次選舉，建制派都被踢爆推長者去票站投票，唔少老友記不知就裏投咗畀一個連名都唔識讀嘅候選人。為咗搗破操控長者投票嘅集團，屬於民主派嘅社會工作者總工會正招募過百名義工「狗仔隊」，監察各區住喺私人院舍嘅老友記會否被投票。
望令建制派知難而退
社總喺facebook話，希望招募100名關心選舉公義嘅同工或朋友，派駐新東、九西及港島，監察私院有否操縱院友投票，呼籲唔忍心見到長者弱老被投票嘅人士報名。社總話，狗仔隊職責包括戶外監察同搜集證據，工作辛苦兼要應變，狗年農曆正月做狗仔，都算應景。
社總前立法會議員張國柱話，留意到有唔少長者根本唔識投票，卻俾人推往票站，一班社工擔心有人教唆長者。
張國柱話狗仔隊遇有可疑個案，一定會上前問個究竟，甚至詢問安排交通嘅司機究竟搞乜，旨在令對方唔好咁明目張膽，收斂一下。
社總社會事務部主任倫智偉話，上屆立法會選舉，社總都有成立狗仔隊，今次補選會專攻集團式經營、貼滿建制派候選人海報嘅私營安老院舍，屆時難免要當場對質，希望對方知難而退。
咁樣事先張揚會唔會壞大事？倫智偉話，佢哋係想預防呢類事情發生，如果建制派知道有人監察而唔敢輕舉妄動，咁呢次行動都已收到「拋浪頭」效果。
李八方