今日係農曆新年假期後第一個工作天，打工仔放咗咁耐假，返工肯定好sad豬，唯有寄望公司封番封大利是，有間銀行唔止派利是，仲打算送金㖭。
講緊嘅係星展銀行，原來今年係金禧，即創行50周年，佢哋就派金飾畀員工，男士有18K金袖口鈕，女士有18K金項鍊，圖形模仿星展標誌，兩樣都淨重50克。
18K金含金量接近75%，回收價閒閒哋都每克200蚊，唔通呢個飾物值10,000蚊？定只係黃金塗層？真係要問吓管理層先知喇。
呢兩個裝飾品今日起會陸續派畀全球24,000名員工，香港近4,000名員工都會收到。咁今年開工利是幾多錢呢？華華聽聞維持住派10蚊，咁管理層應該識做，派大封啲畀員工補數。