嚟緊年初六（21日）周三賀歲谷草夜馬，馬迷如想命中一隻Win，收吓錢攞番個綵，又唔介意賠率太熱，其實都有個選擇。
事關當晚有場賽事，是近期罕有的極度強弱懸殊之戰，乃60至85分組別三班1200米，正選馬中赫然包括蔡約翰馬房、雷神莫雷拉座騎「天下為攻」。
現年四歲的自購新馬精英「天下為攻」，上季三歲時，陣上已擊敗過年長一歲的新灰色神獸「五十五十」，今季「五十五十」大爆發4捷，並貴為董事盃亞軍，已加到121分。
而「天下為攻」上仗於本月4日，休戰半年後季內初出，結果直路一望空已經自動加速掟甩馬群，雷神收晒韁臨尾不鞭不推，照樣輕勝兩馬位，就此完成服役5戰4捷，基本上公認「天下為攻」超兩班，是準一班馬。
今次「天下為攻」以85分二班馬身份，留在三班上陣，還要初跑谷草，對手實力差過沙田一截，而且「天下為攻」上月20日已由雷神贏過谷草大閘，早就試準場地性能，若說「天下為攻」今仗如「大人蝦細路」，實在絕不為過！