今日年初四，以往多數農曆假期完畢，今日全香港返工，但今年年初三啱啱係星期日，故此今日補假一天。過年前，有老友問幾時開工最好，有得揀可以唔返工住嘅，開工吉日自然以年初八2月23日星期五最正，初八係成日，上午九時後至十一時係吉時，真係啱啱好！今日年初四又點呀，都唔錯嘅，可以開工，係定日噃，定即安定之意，宜祭祀祈福、開市動土，返工都啱嘅，吉時係巳時午時（九點至一點），又係碰正上班時間，掂啦！今日開工係好過年初五、年初六、年初七嘅；初五執日，九點後係吉時；初七危日，開工吉時一係太早（凌晨），一係太遲（下午三點後），甚不方便，返早更、夜更者例外。初六係月破日，諸事不宜。所以講番轉頭，最適當開工日子就係初八成日嘅嘞，成日古代視之為大吉日子，萬物成就喎。
根據傅會長一向嘅講法，現代工作涉及電腦，如要在初四假期開工，可簡短地回公司一行，掃吓寫字枱，打開電腦，寫幾個電郵畀客戶，向客戶問安祝福等，視為外交關係、公關要義，當作開咗工，之後咪去行街睇戲囉，到初五就正式返工，誰曰不宜？
對於左丁山呢啲自由工作者，開工日無相干之至，今日早上擇吉時開筆寫一篇稿，之後就到初八先至返公司一行，中間日子就係讀報睇書，一年到頭，輕鬆番一陣都得啩。
有位老友挑戰左丁山：「你平時又唔見擇日，過年就咁多嘢講，玩迷信啫。」香港人可能係全世界最西化之中國人，信教比例甚高，但不少教徒到咗新年，一樣細細聲問吓流年吉日與犯太歲之事，可見新年講意頭，長存於中國人DNA，例如曾蔭權咁虔誠嘅天主教徒，一樣搵人睇風水也。但香港人又講實際實效，如果在農曆年之前後，還是樣樣揀吉日吉時，但過咗年之後，咁樣擇日法，好可能費時失事，浪費資源。好多年前，有人問過肥佬黎：「佐丹奴新舖就快裝修好，你想幾時擇吉日吉時開舖？」肥佬黎回答：「擇你個頭就真，啲舖租咁貴，最好就係今晚十點裝修好，聽朝十點就開舖，理得佢是吉日還是凶日。」嗱，呢樣就係香港人實際之一面嘞，最緊要講時間同效率。有冇相反故事呢？有呀，一位地理系校友精研紫微斗數，連同數學系同學研究出一套只有佢地先至識嘅系統，應用於收購公司談判時間表，結果大獲全勝喎！