羅富全首季從練，今季跑任何盃賽都係第一次，包括今午（18日）第八場一班1400米賀年盃。結果呢位本地練馬師再顯新人王本色，以全場最年長馬「誰可拼」夥拍年輕騎師史卓豐捧盃，從練首勝一班賽，「誰可拼」轉投羅廐後首度贏馬，單Win及組合獨贏A3分別派91及28元。
「誰可拼」由有鞋王之稱Le Saunda老闆李子彬新抱李皓玲持有，本身年屆八歲，上季由方嘉柏訓練三戰杜拜取得兩次位置。此駒實際已接近三年不勝，對上一次贏馬在15年4月尾勝出短途錦標二級賽，當時在高伯新馬房。
今季「誰可拼」過檔加盟羅富全，尋求新突破。今日賽前在羅廐已跑兩仗，均得第五輸近，其中上賽爭元旦日1400米華商會盃，是首由史卓豐策騎的。今次佢選擇繼續操刀，並放棄由自己贏過的姚本輝馬房「旌暉」。
結果「誰可拼」沿途居中前位置，直路加速以頸位之先跑贏「旌暉」，史卓豐首奪賀年盃，個人連同第四場勝出苗禮德馬房「銀紙」，暫時捧盃起孖，揚威狗年賀歲賽。
「旌暉」最終屈居亞軍，三、四名分別是「喜旺寶」及「宅大大」，四重彩派一萬五千幾。