每年大年初三沙田賽馬日，多數都係全季入場人數最多嘅日子。來到狗年初三（18日）的今日，唔少馬迷一早已喺正門排定隊等開門，更一開閘就率先整場賽前熱身賽，為新正頭霸到靚位而你爭我搶，場面相當哄動；而馬會CEO應家柏亦在門口附近，按照農曆新年傳統，向傳媒朋友大派利是。
雖則今午首場開跑時間比平時日馬早半粒鐘，為中午12點半，但唔少馬迷一早已入定場，先同一眾財神爺及馬會特設的桃花裝飾影相，再打響開運鑼鼓後，再欣賞由著名藝人汪明荃及鄭少秋擔大旗的綜合匯演。其間佢兩位大唱多首賀年金曲，令過年氣氛持續升溫。
及後，開幕典禮按往年一貫做法，由醒神舞獅打開序幕，再由馬會一眾高層率領騎師們及表演嘉賓，向馬迷拜年。
另外，練馬師告達理新抱Paris今年相當有運，於每位入場人士都有的抽獎卡中，抽中只得1,000份、每份價值378元的24K包金擺件一份，狗年有好開始！