【《蘋果》專訪】
【閃耀人生女人生 袁詠儀系列之5 事業低谷】
袁詠儀（靚靚）91年拍攝首部電視劇《我愛玫瑰園》即做女主角，當年她年少輕狂目空一切，試過嫌劇本不合理而直接找監製和傳媒投訴，結果被TVB踢入「雪櫃」挫銳氣。
唔識修飾說話
回望過去，靚靚表示沒有後悔：「嗰段時間我好容易得罪人，講嘢可能真係冇思考過，唔係唔知天高地厚，我覺得有啲嘢真係要講㗎，你話我問題喺邊度呢？我就係說話藝術修飾得唔好，我會直接就係『喂！咁樣得唔得呀？』咁你咪就係第一個衝去前面、又冇禮貌、死咪死嗰個囉！TVB雪咗我咁耐，我根本就唔知自己得罪人，但對我嚟講其實都係好運，因為我就係太得閒，突然有個導演叫柯受良就話『喂，可以搵吓呢個叫袁詠儀嘅人』咁我就出咗去拍電影。」
轉戰影圈捧獎
靚靚之後加入電影圈，拍了首部電影《亞飛與亞基》，得到金像獎最佳新演員，事業開始一飛沖天。一年拍14部，她更分別在94年憑《新不了情》及95年憑《金枝玉葉》兩奪金像獎影后，然而，之後又突然走向低谷，靚靚都覺得莫名其妙。
靚靚說：「97、98年突然間冇戲拍，就算搵你拍都係嗰啲7日呀、10日，跟住直頭連呢啲嘅都唔嚟搵你，唔知點解！係咪我有啲乜嘢唔係好啱呢個圈呢？我又冇諗退休，我最多都係諗歇一歇箒，嗰時嘉禾就畀我去上海。」
入行28年，靚靚看盡新人輩出優劣參差：「我覺得話係冇用，要做畀佢睇係點，以前去到現場，導演叫我哋讀劇本排戲，但𠵱家係導演、副導演同攝影師行位，演員就喺出面傾偈。」之前試過有演員不念對白，對住鏡頭講「1234567」之後再配音了事，對此靚靚說：「佢哋𠵱家係勁到助手喺後面講一句『今日食咗飯未呀？』個演員就喺前面『今日食咗飯未呀？』不過我唔會話佢，我覺得惟有感染佢。」
採訪：陳月媚
