大埔「妹妹」是眾多狗店長中，唯一不願意跟主人放工回家的店長，只願日夜留在46年歷史的飲料代理商店內，「你試吓行近櫃枱，佢會吠你𡁻你，因為佢知道櫃枱係放錢嘅地方，一心想保護間舖平安無事」。妹妹是一隻3歲的唐狗女，主人笑說牠是稱職保安，雖看似夥計，但當得知妹妹名字的由來，牠比任何狗店長更似家人，「我有一子一女，我個細女係佢姐姐，所以佢叫妹妹」，妹妹是狗主Connie的「愛女」。
接棒後爛玩變盡責
記者初次見到妹妹，牠是戴着口罩。Connie說妹妹警覺性高，自我保護意識強，需要時間與陌生人混熟。只要有陌生人走近舖頭，牠會走近嗅一嗅，只要有陌生人戴口罩或頭盔，牠即會大吠警告，「如果有佢唔識嘅人行上樓梯，佢會跟住對方；如果有人買完嘢唔記得畀錢，佢會望實追住，追番啲錢」。
「係上一代狗店長財叔死咗之後，妹妹先變成咁，佢之前只係好百厭嘅小朋友，可以玩到兩、三小時唔返嚟，我諗係財叔臨走前，吩咐過佢好多嘢，教過佢點接棒」，19歲的鎮店之寶、唐狗財叔去年離世，妹妹3年前被Connie領養後，兩狗一直同住，財叔仍在世時，每次妹妹做錯事，財叔都會責備，「佢兩個，好有長輩和後輩嘅感覺」。財叔離世當日，妹妹不停行來行去，憂心忡忡，直至財叔死後，牠亦抑鬱了一段日子，「從此妹妹亦由以前好歡迎途人同佢自拍嘅店公關，變成𠵱家唔親人嘅保安」。
「我試過去咗旅行幾日，佢一大清早就喺門口等我返嚟，唔係隻隻狗都做到」。Connie自言是狗癡，養過10隻不同品種的狗。不少家長以為小動物不能與孩子共同成長，家中添了新成員便「棄狗保B」，自小與狗一起成長的Connie，自己誕下子女後未有這樣做，「唔應該棄養，因為狗嚟屋企先，係屋企人，點可以有新嘅屋企人就唔要舊嘅屋企人，小朋友同狗一齊成長係好事」。
訪問期間，Connie的女兒放學回舖，這位姐姐與妹妹玩得不亦樂乎，妹妹對着姐姐，亦顯得比平時聽話，「我一出世就對住狗，同狗共同成長係好開心，我同狗相處開心過人，同學間會嗌交，但同狗玩，佢哋會好開心直接表露出來」。雖然說不上愛狗多過愛人，但Connie說︰「狗忠心過人，狗唔會呃你，但人會呃你。」