怪事常有巧合，蘋果日報翻查資料，發覺2018年2月10日有大埔松仔園巴士失事災難，2017年2月10日，有兇徒在下午七點幾最繁忙時間，在最繁忙之港鐵線往旺角方向在尖沙咀站內點火焚燒；遠在1996年2月10日上午10時，發生八仙嶺山火燒死兩名教師及3名馮堯敬中學學生事件。日子咁鬼雷同，真係巧合，至於巴士災難之發生地點，係大埔松仔園區域，不少老人家都記得遠在五十年代，有猛鬼橋洪水殺人事件。當年左丁山還是細路，唔記得詳情，簡單話畀記者小G聽，現代記者最叻上網，幾分鐘後佢已找到一個名為Cyber X-File嘅網頁所載之大埔猛鬼橋檔案，在1955年8月28日（農曆己末年七月十一，係鬼節七月十四前三天）下午一時三十分，多間小學師生及九廣鐵路員工在大埔滘松仔園旅行，在溪澗旁邊午餐，部分師生於下游猛鬼湖（即今之滌濤山豪宅所在地）游泳，點知天有不測風雲，突下暴雨，遊人走到猛鬼橋底避雨，而山洪突至，不少人走避不及，被洪水沖走，共有28人死亡，其中20人係聖雅各福群會小學學生。之後港英政府將猛鬼橋改名為「怒水橋」，大埔七約鄉公所立石碑「怒水橋洪流肇禍記」以誌紀念。自此以後，大埔滘松仔園鄰近大埔公路十四咪半一段不時發生離奇車禍，老一輩司機揸車經過，都額外小心。30歲巴士司機在此駕車超速，或者係不知忌諱。
小G睇完猛鬼橋舊聞，不禁大呼：「咁鬼邪㗎！」唉邪事好難講，講得多就會畀人鬧迷信，只能講句：「如有雷同，實屬巧合。」但對呢一類陳年舊事，知多啲就會做事小心啲，對自己有利嘅箒。現代天災人禍造成嘅人命死傷事件，會立即成為政治事件，全世界都如是，小布殊與馬英九就吃過颱風災難所帶來嘅苦頭，我地林鄭政治觸覺敏銳，一知有此事就立即取消往胡楓86歲演唱會，本來去紅館，改咗去醫院；運房局局長陳帆本來在啟德出席馬時亨主持嘅MTR傳媒年夜飯，知道死亡人數上升後，第一時間離開晚宴去處理呢單突發公事，於是整個政府有關部門人員，本以為新年在即可以輕鬆吓嘅官員，分分鐘要取消假期，連馬會亦受波及，要捐錢幫助坐上872號巴士嘅散場馬迷，九巴與大股東新鴻基地產點睇呀？九巴高層恐怕亦會捲入政治漩渦，狗年唔使慶祝咯！