話咁快，明日就係大年初一，八方年卅晚都收爐，初五再同大家見面。而環顧立法會議事堂，狗仔議員有3位，而且清一色係男人老狗，雖然本命年值太歲，但唔係個個都諗住去化解，唯一共通點或者係大家都祝願市民幸福快樂，長長久久。
最年長嘅狗仔係建制派謝偉俊，當八方問阿Paul狗年前程時，佢就話跟過李居明學風水命理，所以一講到狗年值太歲，佢即刻解釋未必係壞事，雖然值太歲較為動盪，但亦可以化為動力，令自己更加積極，攝太歲都係形式上嘅事，佢都唔多做，所以唔使攝啦。
許智峯忙寫「下台」揮春
細阿Paul一圈嘅自由黨邵家輝（Peter）。Peter 9歲起就契畀觀音菩薩，而且多年嚟年年都去荷李活道間觀音廟拜神，廿幾年嚟都冇間斷過。唔知咁虔誠嘅Peter今年有咩新年願望？都係政通人和、少啲爭拗咁啦。行貨咗啲喎？Peter加多一樣，希望香港超越新加坡。
再細一個圈嘅民主黨許智峯，可能後生加上有宗教信仰，許智峯話佢唔會攝太歲喇，但媽媽都有提醒佢、甚至會幫佢攝，而佢為咗安老人家心都會配合吓嘅。佢話其實今個新年都幾忙，前後安排咗成廿幾場寫揮春活動，因為可以留意吓市民想寫啲咩就了解到當下嘅民情，近期最熱門嘅當然係律政司長鄭若驊，佢話甚至有市民想要鄭若驊下台嘅揮春㖭呀。不過最搞笑嘅係，民主黨鄺俊宇原來唔肯定自己肖狗定係豬，皆因出世嗰日係年廿七、但又過咗立春，佢話由細到大問過唔少意見，兩種意見都有，笑稱生肖對佢嚟講，簡直係個謎！
李八方