身穿「早唞啦你」字樣圍裙嘅香港眾志周庭，昨午去新民黨攤位踩場，陳家珮（Judy）見狀先禮後兵同對方握手，同周庭講「多謝你過嚟支持我」，周庭就話知道好多建制政團支持Judy，特別着上述圍裙到場，隨即指好多街坊見Judy擺咗好多「空殼街站」但無人駐守，所以送上「旗海飄揚，芳蹤杳然」揮春，擔心將來街坊唔知點搵到佢。
早前英文受訪時出事嘅Judy話多謝「Angus」周庭即糾正「我叫Agnes」，Judy即用中文多謝周庭同佢打氣，指好多義工都好辛苦仍幫佢助選，真係難得。周庭即刻回敬「除咗義工，希望你真人都多啲落街站」，指候選人最重要係落街見巿民，唔係搵權貴同前高官拍片當做咗嘢。
揮春寫定 陳表演點墨
周庭繼而重擊Judy「要害」，指唔少外媒想搵佢做英文訪問但被拒，「我想同你講聲唔使太驚，多啲回應外國媒體訪問」，心平氣和嘅Judy回覆：「多謝你，我選到一定接受晒佢哋訪問。」而Judy之後喺揮春攤位時，只見喺兩張一早寫定嘅揮春前表演「點墨」。點解唔親自寫？佢話手字仲係好核突，惟有扮住先！