新民黨主席葉劉淑儀噚日情人節同黨友容海恩（Eunice）及該黨政策總裁袁彌昌（Derek），一齊落利東街派花，容海恩、袁彌昌呢對緋聞男女，公開同場似乎有啲避忌，全程都保持住一丁點距離，似乎唔肯響應中聯辦主任王志民嘅「行埋論」噃。
八方都有叫Derek送支花畀Eunice，點知Derek話：「遲啲送都得嘅」係咪咁怕醜先？Eunice之前提過噚晚會返沙田同地區人士打邊爐。問起有冇難忘嘅情人節？Eunice欲言又止咁，總之就寄語大家「珍惜眼前人」喎。咁查實Derek係咪做跟得男友，跟佢去打邊爐？佢話「都可以嘅」，續以吞吞吐吐態度回應呢段不能說的戀情。