瑞士雖然喺今屆平昌冬奧仍然未有獎牌落袋,但喺社交平台,佢哋就非常出位。繼早兩日上唧車衝斜坡擺咗上IG後爆紅,今日再獻新猷,直情用單手搭扶手電梯。
話說呢位選手叫法比安保斯(Fabian Bosch),今年只有20歲,係瑞士嘅花式滑雪隊成員。早兩日佢就同隊友模仿冬奧項目長雪撬,選手需要係衝刺前上橇嘅情況,用貨倉必備嘅唧車喺室內衝斜坡,似模似樣。今日保斯IG又有新嘢,只見佢企起扶手電梯旁邊,單臂搭住扶手,然後個人就慢慢跟住扶手電梯升咗上去,係半空只係靠臂力維持,最終仲成功到達上一層,非常犀利。不過都係嗰句,此表演經過長期專業訓練,屋企嘅小朋友行商場或者飲茶千祈咪亂學呀!