求驗客手記:傑志新年照操迎全北慘!科蘭年終無休

求驗客手記:傑志新年照操迎全北
慘!科蘭年終無休

傑志周二晚喺亞冠盃E組作客以0:3不敵天津權健後,大軍昨晨起程返港,預備年初五對全北汽車嘅首場主場賽事,教練朱志光話球隊今日復操,農曆年期間都可能冇假放要續操,備戰實力更強南韓嘅全北汽車。
首次出戰亞冠盃嘅傑志,面對擁有柏圖、韋素同莫迪斯迪嘅天津權健,受天氣同場地因素等影響,喺上半場尾段32至38分鐘嘅短時間內連失三球,終吞三蛋落敗。輸波之餘,仲有中場主力黃洋受傷,部份球員打完呢場硬仗後已露疲態,但球隊下周二(初五)就要迎戰啱啱反勝柏雷素爾嘅全北汽車,大戰當前,傑志球員未必可以放假,有可能進行午練,初嚟埗到嘅星級前鋒科蘭或者無緣感受吓農曆年嘅氣氛啦。

兩個「Alex」朱sir(左)同艾力士喺等行李嗰陣密密斟。

傑志噚日朝早返到香港,今日就會復操備戰初五對全北嘅大戰!

全北主力悉數訪港

教練朱志光噚日返嚟之後話,球員今日復操,先進行恢復訓練。對於首戰大敗喺權健腳下,朱sir讚對手整體實力較強,外援質素亦高,加上場地等因素導致球隊大敗:「球隊首次出戰亞冠盃,球員心情難免有啲緊張,上半場首25分鐘防守都仲ok,場地對球員影響幾大,上半場球隊進攻嗰一邊半場啲草地極硬,仲要唔平,影響傳送質素,下半場大部份球員要改着平底波砵作賽。」佢又話權健下半場進攻亦受到場地差勁影響,威脅唔及上半場。
下周二首場主場出擊,但面對實力可能比權健更強嘅全北汽車,朱sir坦言係大考驗,希望藉主場拉近距離,足總公佈咗全北汽車下個禮拜日(18日)下晝到港,李東國、阿祖安奴、金珍洙及洪正好等主力都會嚟。

柏圖被換走發老脾

贏波嘅權健,有傳亞冠盃贏波獎金高達600萬元人民幣,但教練保羅蘇沙唔滿意下半場表現:「上半場攻守做得唔錯,下半場集中度不及上半場,如果唔係可擴大比數。」內地傳媒仲話前鋒柏圖不滿下半場被換走,喺更衣室發脾氣,而被罰幾萬美金同暫停跟大隊操練!