新年又到，適逢狗年，上屆特首選戰久經風霜嘅前政務司司長唐英年，喺娥特治下領軍西九，出任西九文化區管理局董事局主席，唔知689若然仲做緊特首，西九有冇可能俾唐唐掌握於手呢？
據聞為咗西九，唐唐經常京港兩邊走，無非都係想西九文化區嘅發展，長長久久；上周日佢出席西九文化區苗圃公園舉行嘅自由約期間，仲喜孜孜應節地摸狗。
唐唐近日仲別出心裁，借西九文化區嘅英文名West Kowloon Cultural District嘅簡稱，即係WKCD喺微博同市民拜年，祝全港市民財源廣進（Wealth），小朋友就學業進步（Knowledge），最緊要人人都好似佢咁笑口常開（Cheers），打工仔就必定要步步高陞（Development）！