車路士禮拜一英超憑王牌夏薩特入兩粒，主場3:0炒榜尾嘅西布朗，結束聯賽兩連敗頹勢，領隊干地鬆一口氣，更加值得開心嘅係，干地之前話可能因背傷提早收咧嘅前鋒艾華路莫拉達，今場已經復出，仲入替被踢到爆缸嘅新隊友基奧特㖭！
基奧特爆缸照踢夠熱血
西布朗今場落筆打三更，喺利物浦借返嚟嘅史杜列治開波三分鐘已經腿筋有傷離場，而首次為車仔踢正選嘅基奧特25分鐘交出助攻，同夏薩特做到配合成功破網。不過，「銀河唯一」37分鐘俾西布朗後衞希加斯踢到後腦爆缸，佢紮住都照踢夠晒熱血，去到63分鐘隊友域陀摩西斯射成2:0，而夏薩特就喺71分鐘接應莫拉達嘅傳波入多粒，車仔就咁贏三球。
之前連續兩場輸畀般尼茅夫同屈福特嘅車路士，領隊干地鬆一口氣：「我哋必定為勝出而滿意，不過我認為可以踢得更有信心。經歷兩場敗仗後，我哋嘅信心下降咗，今場保持唔失波都好重要之後都要繼續。」而干地都話基奧特冇大礙，禮拜五嘅英足盃踢得。車仔𠵱家以53分排第四，一分食住第五位嘅熱刺，落後第二位嘅曼聯三分，二至五名嘅形勢非常緊湊。