幾位老友各有各忙，以前每個月一齊吃一次飯，眨吓眼就6個月都冇時間坐埋一齊，卒之在退休賓架W嘅秘書安排下，過年前大家坐埋一齊叫做吃一餐年夜飯。
最近乙型流感肆虐，第一件事就係問：「你有冇去打流感針？」原來只有左丁山在2016年年尾打過，其他人未曾試過。財務L幾日前與朋友去參觀港怡醫院，留下幾好印象，臨走之前，多口問一句：「我想趁此機會打埋流感針，得唔得？」點知醫院人員苦笑：「對唔住，L先生，我地醫院已無流感疫苗。」吓，咁大咁靚咁現代化嘅醫院，竟然冇疫苗？財務L聽完，知道事態嚴重，回家後急急打電話問相熟嘅醫生朋友，個個都話「鎖你鎖你，政府先至有。我地私家診所冇！」
食家T聽咗，唔信，話佢嘅老友家庭醫生L平時收埋大把，一定有嘅，立即打電話搵醫生L，醫生L又係嗰句：「冇晒嘞，問政府啦！」分析F聽完就把幾火，話食衞局及醫管局班高層全無規劃，老早唔買定疫苗，即使有醫管局委員曾經建議多買，政府最後都認為唔駛買，以免浪費，用唔着會畀審計署將軍。
如果買多二百萬支流感疫苗以備緊急時使用，要幾多錢呀？最多咪兩億三億，今個財政年度估計有預算盈餘千五千六億，用多兩億駛唔駛死呀？唉，依家就真係有死人嘞，幼稚園、小學成為重災區，要提早兩天放假，即小學及幼稚園變相停課，差不多等於股市跌停板，要採用熔斷機制。於是大家談話箭頭指向食衞局，醫管局，醫學委員會，認為三者要為香港唔夠醫生，唔夠護士，唔夠流感疫苗負上責任。退休賓架W話：「我去過威爾斯親王醫院，缺乏醫護人員唔在講，連阿嬸亦嚴重短缺，一啲事要由護士做埋，唔怪得啲護士做到有脾氣，一啲本來由阿嬸做嘅厭惡性工作，必要時睇怕要啲姑娘頂硬上做埋。我問過點解唔夠阿嬸，大陸新移民都唔嚟應徵，有乜原因？答案係人工少工時長，某些病人罵人唔駛本，有時啲阿嬸會俾惡病人鬧到喊。左丁山以為將阿嬸人工加上去，吸引力大咗，咪可以請多啲新移民囉。點知唔係，醫生C話只向阿嬸加人工，會引起其他員工反對，產生反感，結果全部人都要加人工；二則阿嬸有咗經驗之後跳去私家醫院，不止人工高好多，還會有內地大款病人打賞貼士，跳槽加薪搵更多！