狗年到，浸會大學商學會20名成員投得維園125號檔開「狗狗震」，經過3個多月時間終於開張，《蘋果》化身年宵狗仔隊，直擊籌備到開檔過程。佢哋由10月籌備，集資8.4萬，主席栢浩話，呢個檔口過去幾年都係浸大做，今年繼承傳統。
Mandy話招股時首日已售罄，本來限定每人只可持最多10股，但有「大戶」掃貨，「個同學帶咗好多錢返嚟，可能十幾萬。」佢用其他同學身份掃入100股，最終經溝通退回30股再開放認購。因投檔花2.6萬，比預算貴3,000蚊，惟有降低成本。採購部Dickson指，結果除咗有自家設計文件夾、Tote bag，都要為咗慳啲錢買入內附小被子嘅貓狗公仔轉售。
人多手腳亂，例如影合照已一波三折，最終要分開影。追訪期間佢哋搵房開會、執紙皮、十幾人一齊製作道具，但開檔前一天掛banner先發現尺寸唔啱，而且又發現賣嘅小精靈帽唔受小朋友歡迎，只因有代溝，「佢哋問『咩嚟㗎？』」
除咗搵錢，佢哋更加想體驗「大家一齊過夜、一齊嗌，大學生活就係要體驗呢啲熱血。」
