本港的現役外籍騎師，都是一早有名氣，才能來港策騎。
好似潘二哥潘頓，未嚟香港時好猛料，03年以見習騎師身分，榮膺澳洲布里斯本冠軍騎師，想搵佢以前啲鞭鞭有力嘅外地片，用谷歌大神就最perfect，但搜尋Purton（潘頓）時，谷歌大神卻彈出澳洲有隻馬叫Purton，同潘頓英文名一樣。唔通有人同潘頓好大仇口，要佢做一隻未來幾年俾人狂鋤狂鞭嘅馬？
你知啦，原理就好似同鵝頸橋打小人的姐姐一樣，唔單止每朝操馬可以騎住潘頓（Purton），而且令佢日日接受胯下之辱，隻馬唔肯跑嗰時，仲可以一路大大力鞭落去，打到啪啪聲，一路講打你隻手，打到你有氣無碇唞，打你個肚，打到你嘔白泡。
不過，以上情況都係FF嘅啫，不過相信潘頓一啲都唔介意自己個名，改落啲畜牲度，因為原來潘頓自己家中有一頭狗公，潘頓就正正為愛犬改名做「潘頓」，所以外國人思路真寧捨blue同。
香港冇耐前都有隻馬叫「雷神」，可惜得唔到雷神莫雷拉嘅垂青，一次都冇騎過，聽唔到賢仔call live個時大叫雷神騎「雷神」贏馬喇，咁樣都算係遺憾。
另外，澳門都有隻馬叫「柏寶」，不過同樣本港騎師柏寶未騎過。唔知呢次澳洲隻Purton，會唔會出現潘頓騎潘頓呢？