積金局喺7年前起開始用社交媒體作為公眾教育，上星期又推出新嘢，就係積金局「全積特攻」嘅facebook專頁，推出facebook messenger聊天機械人「Messenger Bot」。
八方試玩過，Messenger Bot會同市民對話，只要喺呢個專頁嘅Messenger打出有關強積金問題嘅關鍵字，Messenger會即時自動提供答案，如果唔識答，機械人會話「特攻唔明白你嘅意思」，市民可以㩒「聯絡特攻」，積金局會有專員解答。
積金局執行董事及機構事務總監鄭恩賜話，積金局應該係首個透過Messenger Bot提供資訊同推廣公眾教育嘅公營機構，希望由專頁對群眾「一對幾」嘅形式，加設「一對一」嘅形式，百貨應百客，咁就毋須再喺專頁嘅一堆資料中搵答案。