今日(11日)禮拜假期，沙田馬場晨課較冷清，到場督操的練馬師不多，告東尼卻是其中之一，而且還十分積極。
天未光告東尼便到烽火台門外，在隧道口位置逐一檢視「仗義執言」、「友情人」及「劍聶風」三匹周三(14日)谷草戰馬，向鞍上人給予操練指示，目送人馬往大圈做工夫，然後告仔返回烽火台，用望遠鏡吼實牠們出跳過程，非常緊張，擺明必有出擊分子在其中。
上述馬匹計賽績，當然是角逐三班1650米的「劍聶風」最值得重視，本身5戰谷草一哩得1冠2亞1季，唯一落第亦跑第五輸不足兩馬位，此路程威力有幾強毋須多講。
上仗「劍聶風」演出較差純因泥地不合，今次回師強項谷草一哩，兼且將回配騎過兩次非冠即位的雷神莫雷拉，牌面一流，唔怪得告東尼今朝咁緊張啦！