被DQ議員資格嘅劉小麗，今年喺維園年宵擺攤，名叫「小麗新春墟市」，第一晚已由朝早10點踩到凌晨3點。小麗特別去上堂扭氣球，𠵱家已經可以扭出大吉同桃花等公仔，佢透露嚟緊情人節仲整埋玫瑰，相信有助銷情。
除咗扭波，小麗更親自為布袋畫咗幅畫，配上「在頹垣中創造希望」八字，希望香港人唔好灰心，繼續創造希望，佢亦同設計師合作，整咗款希臘神話西西弗斯嘅布袋，寓意以堅毅意志，就能夠對抗荒誕嘅打壓。但最好賣嘅係一款寫有「與其儲錢買樓，不如輕鬆遠走」嘅布袋，小麗相信表達到香港人對樓價過高嘅不滿，另一款熱賣布袋就寫有「我要瞓到自然醒」，八方相信係一眾打工仔最貼身嘅願望咯！