大埔公路前日發生恐怖巴士翻側車禍後，唔少建制派政黨包括新民黨同民建聯都因獲邀官員為車禍善後而取消原定嘅維園年宵開幕活動，經民聯就繼續舉行，但成員就素服出席，發言時亦有悼念死傷者。
經民聯今年攤位名為「大汪區」，趁狗年食埋大灣區熱潮，今次仲同動物英雄聯盟合作，身為聯盟創辦人兼經民聯青委會副主席嘅林建岳千金林顥伊，噚日抱住愛犬Lovely現身為聯盟籌款，佢話Lovely吸引咗唔少巿民幫襯，透露現時養咗4隻狗，除咗第一隻係買番嚟，其後認識到無良繁殖好殘忍，其他3隻都係領養，希望透過今次籌款，可以令聯盟有更多資源推廣領養。佢仲話爹哋畀咗好多自由佢，知道保護動物係佢嘅passion，所以都好支持佢。