2.28呢個日子，今年對港人嚟講有大事發生，皆因財政司司長陳茂波當日會公佈喺娥班子內首份財政預算案，廣大市民當日知道自己有冇餅仔分。娥特早前出席活動時預告過，預算案會有驚喜，點知未知道內容，波叔或已被嚇驚，娥特嘅新春酒會竟然喺當日舉行，係咪唔想預波叔一份？
講番正題，波叔噚日喺網誌談及預算案，透露咗少少派錢方向，佢話預算案除咗會提及推動經濟發展，亦會幫助弱勢社群向上流，紓緩跨代貧窮，建立關愛共融嘅香港。
波叔表明會繼續投放資源，除咗優化醫療同安老服務，亦會更好地培育下一代，要為佢哋提供更大嘅發展空間，等佢哋睇得到希望，實現理想，似乎教育同創科都係獲派錢嘅重點方向。至於直接派錢嘞喎，波叔無談及，但相信機會唔大。