《城市論壇》噚日討論終審法院對公民廣場案嘅判決，民建聯立法會議員蔣麗芸同今次案中被告、香港眾志黃之鋒同台舌戰，元秋話今次案件涉及煽惑、教唆：「雖然我聽黃之鋒講過：『我冇暴力』，我有朋友彈起，話『你冇暴力，但你煽惑』！」
元秋：畀我講埋先
之鋒聽到已覺得元秋嘅邏輯好唔對路，即時想反駁，點知元秋施展「獅吼功」，大叫畀佢講埋先，點知佢話，若有銀行打劫案，主腦人冇參與打劫，但佢有份指使：「你話佢（主腦）有冇罪？梗係有罪啦。」
之鋒當然申明，自己係被控「煽惑他人參與非法集結」同埋「參與非法集結」，法庭已裁決前者嘅「煽惑」控罪係不成立，連律政司都冇覆核控罪：「按法庭嘅判決，我係只有參與，但係冇煽惑，同埋參與集會嘅人係有獨立思考，又點能夠輪到我去煽惑呢？」
元秋期間又指雙學三子唔係重奪公民廣場，而是「搶奪政治廣場」，當之鋒要反駁時就斥對方插嘴，「呢個人真係好無禮貌」。吖，唔知公眾評價邊個冇禮貌呢？