C朗返嚟喇！皇家馬德里禮拜三歐聯16強首回合主場撼巴黎聖日耳門（PSG）前，上星期六嘅西甲先憑基斯坦奴朗拿度（C朗）大演「帽子戲法」，主場5:2大勝皇家蘇斯達，近四場聯賽三勝一和，一洗季初頹風。C朗職業生涯已累積552個「士哥」，而佢今季喺西甲亦累積11個入波，踏入2018年後入咗七球，腳風同效率都回復以前入球機器嘅本色！
領艦隊5:2炒皇蘇
上輪聯賽作客利雲特僅和2:2嘅「艦隊」，今場開波未到一分鐘就開紀錄。C朗喺左路一輪插花後左腳傳中，伏兵後柱嘅盧卡斯華斯基斯頭槌攻門，皮球貼柱入網，皇馬開賽47秒後即入波。27分鐘，馬些路左邊底線傳中，禁區內嘅C朗居然無人看管，造就佢輕鬆撞射破網。
戰至34分鐘，皇馬再次拉開比數。早前先開紀錄嘅華斯基斯喺禁區頂右輔傳入中路，德國中場卻奧斯第一時間起腳得手，皇馬領先至3:0。三分鐘後，克羅地亞國腳莫迪歷右路開角球，C朗力壓人群中跳頂得手，皇馬半場遙遙領先四球。
易邊後，皇蘇喺74分鐘由奧耶沙巴爾助攻莊巴迪斯達破蛋，但C朗喺80分鐘三度破門，完成帽子戲法之餘，亦助皇馬恢復領先四球嘅優勢。曾效皇馬兩季、之後回歸母會嘅西班牙中場伊拿拉文迪，之後喺83分鐘雖然為客隊再入一球，但只能稍為拉近差距，皇馬最終以5:2大勝。
叫球迷咪噓賓施馬
繼對拉科魯尼亞同華倫西亞梅開二度，C朗今場更加連中三元，踏入2018年終於擺脫上半季嘅低沉。喺呢場波，今季狀態持續低迷嘅賓施馬，下半場尾段又有一次近門失機，畀主場球迷報以噓聲，C朗即刻對看台方向揮動手指，示意球迷唔好再噓賓施馬，完全展現大佬風範！
皇馬即將喺歐聯撼PSG，C朗嘅入球不斷當然係最好嘅準備。教練施丹亦都話，皇馬已準備好接受PSG嘅挑戰：「我從來冇擔心過C朗嘅入球能力，我哋已經準備好出戰禮拜三嘅賽事。」的確，C朗就算上半季腳風唔順，歐聯六場分組賽都入九球，睇嚟呢場豪門戰佢都繼續會係主角！