【本報訊】「車廂內好多人傷咗瞓晒喺度成車血，有個男人成頭都係血昏迷，身邊另一個就大叫細佬唔好死，又有女人攬住被夾住唔郁得嘅老公求救……」在馬會投注站工作的唐太（圖）是「奪命九巴」的乘客，她昨講述經歷時猶有餘悸。
「司機上車嗰刻好不滿」
唐太算是車禍中較幸運的一人，她臉部、手腳受傷，留醫一夜昨已出院。唐太表示，前日收工後打算坐872線九巴到大埔會合朋友，走至站頭時見有兩輛空巴士但未有司機，當時人龍排至天橋上，排隊巿民已有怨言，巴士未有在6時準時開出，約5分鐘後車長才到來，「啲乘客係咁鬧佢遲開車，佢冇回應，但全程黑面，上車後扣好安全帶亦擰埋一邊臉，冇正眼望過乘客」，她表示當時全車客滿，下層約有10人站立。
「司機上車嗰刻係好不滿、好不屑，我懷疑佢係特登踩行油等人驚吓，等你企唔穩」，她形容巴士駛至九肚山迴旋處後就加速行駛，「架車好狼、好篩，但冇人開口鬧過司機」。未幾巴士失控似單轆離地行駛時，「大家尖叫，跟住架車就翻咗，我坐左邊中排靠窗，啲玻璃碎就射向我塊臉，鄰座又壓埋落來，好彩佢冇乜傷，好快爬起身」，唐太有意識起身時，見附近全部是血人，「有幾個人瞓低冇知覺，全部都爆晒缸，我後面有個男人應該係阿哥，捉住一個成頭血嘅人大叫『細佬唔好死』；有個男人被座位夾住昏迷，佢老婆攬住佢雙腳叫人幫手」。
唐太形容車廂如地獄，翻車一刻人叠人，逃生時變人踩人，「我都要檻過傷者同爬過玻璃碎血路，最後由捐車頭出嚟」。她又表示，走出車外見十多名傷者已坐地待救，而車長當時亦走出車外，他一臉茫然，但沒幫手救人，只是掛住打電話。
■記者徐雲庭