新一季日聯開鑼之前，上周六上演前哨戰日本超級盃。上屆日皇盃冠軍大阪櫻花果然踢盃賽有一手，3:2擊敗上季日聯冠軍川崎前鋒，先拔頭籌（圖）。
櫻花喺上季盡攬日皇盃同日聯盃兩項本土盃賽冠軍，當中日聯盃決賽正係贏前鋒封王。今場波踢起嚟亦比準備衞冕日聯嘅前鋒醒神，隊長山口螢同埋今季轉着10號波衫嘅清武弘嗣，喺上下半場各入一球，一度領先至2:0，而呢兩個入波都係由最近先傷癒嘅前鋒杉本健勇助攻。前鋒好快破蛋，由上屆日聯神射手小林悠入12碼追返球，但78分鐘櫻花由高木俊幸建功再拉開比數，到補時階段回歸前鋒嘅大久保嘉人近門射入，可惜為時以晚。
櫻花攞頭彩有3,000萬日圓（約216萬港元）冠軍獎金；至於川崎前鋒就算輸波，都有2,000萬日圓獎金落袋。