人有三衰六旺，大家同係練馬師，蘇保羅運程明顯遠勝賀賢。今午（10日）沙田第五場四班1400米東華三院挑戰盃，蘇保羅有「紅旗星將」在梁家俊胯下開齋，延續馬房旺勢，反觀此場賀賢搏輸「幸運時代」做二奶，馬房繼續唔識贏，可謂有人快樂有人愁！
四歲馬「紅旗星將」以往多次後上入三甲，但因應今日跑道大利放頭，此駒亦刻意改變戰略，沿途前置，追趕放頭馬，直路加速有力贏一頭位，跑到第12次終於開齋，今場單Win及組合獨贏A3分別派109及24.5元。
「紅旗星將」鞍上人梁家俊昨晚（9日）以「傳承隊」之名出師「騎師馬術接力賽」無功而還，今午隨即捧走東華三院挑戰盃補數，並與蘇保羅繼上周日（4日）憑「環翠戰士」勝出仁愛堂盃後，再以師徒之名合作在日賽捧盃。
賀賢去年10月25日贏「開心健康」後，已食白果三個幾月，今仗「幸運時代」用潘頓被捧成2.9倍大熱，留前鬥後追唔切，影相不敵「紅旗星將」屈居亞軍，本身連續兩場出擊跑位置贏唔到，馬房亦告繼續守齋。
第五場第二至四名順序由「幸運時代」、「魅力知寶」及「帝勝之星」取得，四重彩派一萬三千幾。