這天（10日）沙田頭場四班1000米直路賽，田泰安停賽，結果益了史卓豐，他接手田泰安騎開，苗禮德馬房的「新強勇駿」熱門取勝，單Win及組合獨贏A2分別派42及20元。
3歲澳洲自購新馬「新強勇駿」上仗服役初出跑直路賽已成大熱，但際遇非常差，抽欠佳的2檔，大半程受緊逼冇位望空，最後150米更嚴重失蹄，幾乎將鞍上人田泰安拋落嚟，完全失去爭勝機會，跑尾三而回。
今次「新強勇駿」抽9檔形勢改善，沿途亦順風順水，起步迅速，貼住外欄一放到底，就此輕勝亞軍「霸勝」兩馬位開齋，擺明是超班貨色。
有人快樂有人愁，4歲的「霸勝」試過多課大閘均有好走勢，備戰多個月瞄準今仗才上陣，存心久休復出即勝，藝人陶大宇戴住隻金鋼地通拿勞力士錶，特意入馬場前來支持「霸勝」馬主葉俊成，可惜此駒的狀態進度似乎遜於「新強勇駿」，在華將梁家俊屈居亞軍而回，但表現已不俗。
頭場第二至四名順序為「霸勝」、「金鼓齊鳴」及「辣辣椒」，四重彩派14,398元。