【本報訊】屹立東區近半世紀的筲箕灣街市，因出租率長期偏低，食環署決定本月底關閉。街市僅餘兩檔開門做生意，周末走進街市內十室九空，人流稀少，與東大街人流如鯽形成強烈對比。經營紙紮逾30年的東主見證街市興衰，檔主與街坊由客人變成朋友，臨別在即大感無奈，但最不捨始終是街坊情。
記者：譚靜雯
筲箕灣街市1973年落成，兩層大樓共有82個檔位，但出租率過去3年一直僅56%。星期六中午時分，走進街市十室九空，部份攤檔擺放雜物，不少更已交吉，僅有兩檔開門做生意。昔日筲箕灣是個漁港，水上人聚居，其中一檔仍營業的海味乾貨檔主鍾太，就是在海上長大的漁民，「阿媽喺捕魚，七兄弟姊妹都喺船度大㗎，我細細個都去過南中國海攞魚」。10多年前她因年紀漸大，放棄水上人生活，上岸先在街邊擺檔賣乾貨海味，其後才遷入筲箕灣街市，每天風雨不改朝八晚五開檔。
「生意最好係個廁所」
其檔口的乾貨包羅萬有，蠔豉、蝦乾、鹹魚、花膠等數之不盡，「啲貨係細佬度攞番嚟，自己再曬乾」。歲晚臨近，不少街坊都專程找她辦年貨，「呢幾日係最忙啦」。忙碌過後，難逃結業命運，「政府話收就收，我哋都冇得反抗」。苦心經營多年，她當然不捨得，堅持做到最後一日。
在海味檔旁的黃先生於筲箕灣街市售賣紙紮物品已經30多年，見證街市興衰，「呢度嗰時好旺，好多人買嘢，品種又多，豬牛羊乜都有，食得嘅豆腐、芽菜、魚乜都有得賣。之前生意唔係差㗎，但金華街（露天街市）開咗之後，呢度（生意）就越來越差」。他更笑言，現時街市生意最好是2樓的洗手間，「試過唔發市，但最旺盛係個廁所，日日都有人問廁所係邊，最多人幫襯」。
街市月底關閉，檔口下月搬到愛秩序灣街市繼續營業，「始終都要面對現實，最終都係要走」。30多年來他與街坊由客人變成朋友，臨別在即，他最不捨是一群熟客及街坊，「啲客好遠喺元朗都返嚟搵我，佢哋細細個喺呢頭大，結咗婚喺嗰邊住都返嚟搵我，大家做咗好朋友……仲叫我千祈唔好唔做，話唔做點搵返你，仲緊張過我自己」。
黃先生的新檔口租金比現時貴逾一倍，又慨嘆紙紮物品已是夕陽行業，「難聽啲呢行做多10幾、20年都冇得做」。